પરદેશની એક પ્રાથમિક શાળાના બાળકોને ભગવાનને પત્ર લખવાનું કહેવામાં આવ્યું. પત્રોમાંના થોડાંક વાક્યો..

• હે ભગવાન, તું કેટલું બધું કામ કરે છે ! જગતની દરેકે દરેક પ્રવૃતિ તેમ જ વ્યક્તિનો તું ખ્યાલ રાખે છે. તો હેં પ્રભુ, તું વેકેશન પર જાય ત્યારે આ બધું કોણ સંભાળે છે ? – જેન
• સાચું કહું ભગવાન ? પ્રાર્થનાના સમય સિવાય પણ હું ઘણી બધી વખત તારા વિશે વિચારું છું. – ઇલિયોટ
• ભગવાન ! હું હંમેશા એવું માનતી હતી કે નારંગી અને જાંબલી રંગ એકસાથે ક્યારેય સારા ન લાગે. પણ ગઇકાલે તારી ખીલવેલ સંધ્યાના રંગો જોયા પછી મારી એ માન્યતા જ બદલાઇ ગઇ. – માર્ગારેટ
• એક ખાનગી વાત પૂછી લઉં ભગવાન ? તમે ખરેખર અદ્ર્શ્ય છો કે પછી એ કોઇ ચાલાકી, ટ્રીક છે ? !! – લ્યુસી
• હે ભગવાન, શું મારા પપ્પા નરકમાં જશે ? મારી મા કહેતી હતી કે જો મારા પપ્પા ઘરમાં ખરાબ શબ્દો બોલશે તો જરુર નરકમાં જશે. – અનિતા
• ભગવાન, સાચ્ચે સાચ્ચું કહેજો હોં !! તમે ખરેખર જિરાફને આવું જ બનાવવાનું નક્કી કરેલું કે પછી અકસ્માતે જ એ આવું લાંબી ડોક વાળું બની ગયું ? – નોર્મા
• હે ભગવાન, માણસોને મરી જવા દઇને નવા બનાવ્યા કરાવાની ઝંઝટ કરવા કરતાં હાલમાં જે જીવતા છે એ બધાને કાયમ રાખી દો તો કેવું ? – જેન
• હેં ભગવાન, આ બધા દેશોની આસપાસ રેખાઓ કોણ દોરે છે ? – નાન
• હેં ભગવાન, તમે રવિવારે જ પ્રાર્થનાનો દિવસ કેમ રાખ્યો છે ? અમારા માટે એકાદ દિવસ તો આખ્ખો રજાનો ન હોવો જોઇએ ? – ટૉમ
• હે પ્રભુ, મને એક નાનકડો વછેરો મોકલી આપો ને !! એમ કરો, મોકલી જ આપજો. કારણ કે મેં આ પહેલી જ વખત તમારી પાસે કંઇક માગ્યું છે. વિશ્વાસ ન આવે તો મારા ખાતાની ચોપડીમાં જોઇ લેજો !! – બ્રુસ
• સાચું કહું ભગવાન, મારો નાનો ભાઇ ઉંદરડો જ છે. મારી બધી વસ્તુઓ એ કાપી નાખે છે. બસ, એને એક પૂંછડી ઉગાડી દેજો, હા !! હા !!.. – ડેની
• ભગવાન હું મોટો થઇને મારા ડેડી જેવો બનવાની ઇચ્છા રાખું છું, પણ મને આખા શરીરે એમની જેટલા વાળ ન ઉગાડતા !! – સામ
• હે ભગવાન, તમે મારી જરા પણ ચિંતા કરતા નહીં !! રસ્તો ઓળંગતી વખતે હવે હું બંને તરફ બરાબર જોઇ લઉં છું ! – ડીન
• તમે તો બધાને જોઇ શકો છો ને બધું જ જોઇ શકો છો ને પ્રભુ ? આ રવિવાર તમે ચર્ચમાં જોજો, હું તમને મારા નવા બુટ બતાવીશ !! – મિકી
• તમે બાઇબલમાં લખ્યું છે તે પ્રમાણે હું પણ 900 વરસ જીવી શકું એવું કંઇક કરી આપજો ને ભગવાન !! – ક્રીસ
• ભગવાન, આજે અમને નિશાળમાં શીખવાડ્યું કે થોમસ આલ્વા એડીસને લાઇટબલ્બની શોધ કરી. પણ ચર્ચના પાદરી તો કહેતા હતા કે પ્રકાશ તમે બનાવ્યો છે. તો જોઇ લેજો, ક્યાંક એડિસને તમારી શોધ પોતાના નામે તો નથી ચડાવી દીધી ને ? – ડોના
• તમે મને નાનકડો ભાઇ મોકલી આપ્યો એ બદલ તમારો આભાર ભગવાન, પણ મારે તો નાનકડું ગલુડિયું જોઇતું હતું !! – જોઇસી
• ભગવાન, હું ખાતરીપૂર્વક કહી શકું છું કે આ જગતની દરેકેદરેક વ્યક્તિને ચાહવી તારા માટે ખૂબ જ કપરું કામ બની રહેતું હશે નહીં ? અમારા ઘરમાં તો અમે ચાર જ જણ છીએ છતાં એકબીજાને ચાહી નથી શકતા !! – જ્હોન

બાળકો ભગવાનની કેટલા નજીક હોય છે !!!!

ડૉ. આઇ. કે. વીજળીવાળાના પુસ્તક ‘અંતરનો ઉજાસ’માંથી સાભાર