Like this:

‘કવિલોક’ > મે-જુન 2004                                           

 

તને ખબર છે ?

હવે મને કોઇ ફરિયાદ નથી

ખાવા પીવાનાં, સુવા જાગવાનાં

અને માત્ર હસવાનાં

સમયપત્રકો મેં ગોઠવી દીધા છે.

 

વહેવાની મનાઇ ફરમાવીને

બધાં ઝરણાંઓને મેં

મુઠ્ઠીમાં સુકવી દીધાં છે.

સોળ ઉઠી આવે એવી સખ્તાઇથી

શાંતિના શબ્દોને હથેળીમાં ચીતરાવી દીધા છે

 

આંગળીઓ પર નખ વાગે નહીં

એટલે એને ઉતરડી લીધા છે

તો યે હાશકારો મારી સામે

કેમ ટગરટગર જોયા કરે છે ?

અને મારી મજાક ઉડાવે છે ?

 

એને પકડીને કેટલીયે વાર પૂર્યો

પણ છટકી જાય છે

અને પાછો

નજર સામેથી ખસતો યે નથી

 

કંઇ નહીં

એની પરવા કરે છે મારી બલારાત

બાકી કોઇ જ તકલીફ નથી…

ખુશ ?

ચાલ હવે હાથ મિલાવ…….. લતા હિરાણી